Mutetu a tres peis cun coa
de Antoni Nàtziu Garau
Ca seus in tempus tristus
cun custa pandemia
pedeus un’arregallu.
Ca seus in tempus tristus:
saludi e traballu
e torra s’alligria
si donit(i) su Cristus.
Cun custa pandemia:
si donit(i) su Cristus
saludi e traballu
e torra s’alligria.
Pedeus un’arregallu:
si torrit s’alligria
si donit(i) su Cristus
saludi e traballu.
Cun spìritu divinu
in custa Pasca Manna
fadeus su vacinu
cantendi “osanna, osanna!”.